聽音樂，起雞皮？🎧🥶
音樂同情感往往都係密不可分。有時我哋鍾意聽某一首歌，唔係因為旋律好聽，而係因為首歌所勾起嘅情感或回憶。當我哋享受某啲音樂嘅時候，有時會有一種雞皮疙瘩嘅感覺，當中背後嘅原因係啲咩呢？
🌟咁點解聽音樂會起雞皮？
簡單嚟講，音樂引起嘅顫抖或者毛管戙係由情緒觸發。當聽到音樂然後享受其中嘅時候，我哋內裡嘅情感就會被牽動。能強烈地牽動情感嘅音樂有兩種特徵：
1. 熟悉程度 — 我地喺適當嘅聽歌環境，聽熟悉嘅音樂，就會聽得更投入，自然有更強嘅情感反應。
雖則如此，我哋通常會於幾日內習慣咗嗰首樂曲，而同一首歌再唔能夠引起好似第一次聽嗰時咁強烈嘅情感。因此音樂中需要含有第二個特徵：
2.出乎意料嘅因素 — 估唔到會出現嘅元素，如獨唱者嘅聲音、突然嘅大細聲、節奏轉換或新嘅和聲會增加聆聽者嘅注意，喺情感觸發上亦十分重要。毫無準備地引入呢啲音樂特徵係引起注意嘅捷徑，強烈嘅情感因而被激發，令聆聽者嘅感官專注在音樂上。
🌟邊啲人聽音樂會起雞皮？
我哋會否因聽音樂而毛管戙，取決於性格同埋聽音樂嘅習慣。研究指出，會起雞皮或者顫抖嘅人通常喜歡涉獵較廣嘅音樂風格。同時，因為喚起情感係一個無意識嘅過程，只受每個人嘅經歷所影響，唔需要主動分析歌曲嘅特徵，所以不論你係咪音樂家都好，音樂都可以令你顫抖同起雞皮！
參考資料:
Music Perception: An Interdisciplinary Journal, Vol. 24, No. 3 (February 2007), pp. 297-314
